དེ་ཡང་འཛམ་གླིང་ཞི་བདེའི་དེད་དཔོན་༧གོང་ས་སྐྱབས་མགོན་ཆེན་པོ་མཆོག་དང་དཔལ་༧ས་སྐྱ་གོང་མ་མཆོག་རྣམ་གཉིས་ཀྱིས་དབུས་པའི་ས་སྟེང་རྒྱལ་བསྟན་འཛིན་ཅིང་སྤེལ་བའི་བསྟན་འཛིན་གྱི་སྐྱེས་བུ་རྣམ་པའི་སྐུ་ཚེ་བརྟན་ཅིང་མཛད་ཅིང་རྒྱས་པ་དང་། མཁའ་ཁྱབ་ཀྱི་སེམས་ཅན་ཡོངས་ལ་བདེ་སྐྱིད་འཐོབ་པའི་ཆེད་དུ། ལོ་གཉིས་ཀྱི་སྔོན་ནས་བཟུང་གུས་པ་སྤྲུལ་སྐུ་ཡེ་ཤེས་དང་ཆོས་ཚོགས་པ་ཁིར་སི་ཁྲིན་གཉིས་ཀྱིས་གསོད་ངེས་ཀྱི་ཉེན་ཁའི་ནང་ཚུད་པའི་སྲོག་ཆགས་ཉམ་ཆུང་སྡིག་སྲིན་དང་ཉ་འབུ་དག་གི་ཚེ་སྲོག་བླུ་བའི་ལས་རིམ་ཞིག་བཀོད་སྒྲིག་ཞུས་ཡོད་པ་དང་། འདི་ཟླའི་ཚེས་དགུ་ཉིན་དཔལ་ས་སྐྱ་གོང་མ་འཇིགས་བྲལ་བདག་ཆེན་རིན་པོ་ཆེ་མཆོག་དང་བདག་མོ་སྐུ་ཞབས་རྣམ་གཉིས། ས་སྐྱ་དགོན་པའི་མཁན་པོ་བྱམས་པ་བསྟན་འཕེལ་དང་ཆོས་ཚོགས་པ་སུམ་ཅུར་ཉེ་བ་སྤྲུལ་སྐུ་ཡེ་ཤེས་དང་ཁིར་སི་ཁྲིན་གཉིས་ཀྱིས་བཀོད་སྒྲིག་ཞུས་པའི་མཚོ་ནང་སྲོག་ཆགས་སྡིག་སྲིན་གྱི་སྲོག་བླུའི་དགེ་སྒྲུབ་ཀྱི་ཆེད་དུ་ཆིབ་སྒྱུར་གནང་ཞིང་། ཐོག་མར་ཆོས་ཚོགས་པ་དག་གིས་ཞལ་འདེབས་སུ་ཕུལ་བའི་ཨ་སྒོར་གཅིག་སྟོང་ཉིས་བརྒྱ་ཙམ་གྱིས་སྡིག་སྲིན་བརྒྱ་དང་ལྔ་བཅུ་སྐོར་ཉོས་རྗེས། མཚོ་འགྲམ་གྱི་མཛེས་ལྗོངས་ཉམས་དགའ་བ་ཞིག་ཏུ་ཕེབས་ཏེ་འཕགས་པ་བཟང་པོ་སྨོན་ལམ་གྱི་རྒྱལ་པོ་གསུང་སྒྲོག་གནང་ཞོར་ཉམ་ཐག་སེམས་ཅན་དེ་དག་ལ་མྱོང་གྲོལ་དམ་རྫས་སྣ་ཚོགས་ཀྱིས་སྦྲུས་པའི་ཆབ་ཀྱིས་བྲན་ཅིང་། དེ་ནས་ཚོགས་མི་ཡོངས་ཀྱིས་མགོན་པོ་འོད་དཔག་མེད་དང་ཐུགས་རྗེ་ཆེན་པོའི་མཚན་སྔགས་ཟློ་ཞོར་དུ་རེ་རེ་བཞིན་མཚོ་ནང་དུ་མངགས་ཏེ་མི་འཇིགས་སྲོག་གི་སྦྱིན་པ་རླབས་པོ་ཆེ་གཏོང་བར་མཛད་པའི་གནས་ཚུལ་སྙིང་བསྡུས་སུ། སྐྱེ་འཆིའི་བཙོན་དུ་ཚུད་པའི་ཉམ་ཐག་འགྲོར། ། མི་འཇིགས་སྲོག་གི་སྦྱིན་པ་བཏང་བའི་དགེས། ། བསྟན་འཛིན་ཞབས་བརྟན་མཁའ་མཉམ་འགྲོ་བ་རྣམས། ། བདེ་སྐྱིད་སྣང་བའི་དཔལ་ལ་ལོངས་སྤྱོད་ཤོག ། སྤྲུལ་སྐུ་ཡེ་ཤེས་ཀྱིས།  

  བདག་ཆེན་རིན་པོ་ཆེ་མཆོག་གིས་རབ་གནས་གནང་བཞིན་པ།   བདག་ཆེན་རིན་པོ་ཆེ་དང་ཀཿཐོག་རིན་པོ་རྣམ་གཉིས། བདག་ཆེན་རིན་པོ་ཆེ་མཆོག་དང་བླ་མཁན་གྲྭ་གསུམ། སྤྱི་ཟླ་བདུན་པའི་ཚེས་གསུམ་ཉིན། འདི་ག་ས་སྐྱ་དགོན་པའི་ཤར་སྒོའི་ཕྱོགས་སུ་གསར་འཛུགས་ཞུས་པའི་གུ་རུའི་གཟུངས་སྔགས་དུང་འཁོར་སུམ་ཅུ་སོ་གཉིས་བལ་ཡུལ་ནས་གདན་འདྲེན་ཞུས་ཏེ་སྒྲིག་བཀོད་ལེགས་པར་གྲུབ་པའི་རབ་གནས་མཛད་སྒོ་གཟབ་རྒྱས་ངང་འཚོགས། དེ་ཡང་ཐོག་མར་དཔལ་༧ས་སྐྱ་གོང་མ་དབུ་བཞུགས་ཀྱིས་ས་སྐྱའི་བདག་མོ་འཇམ་དབྱངས་དཔལ་མོ་དང་། ཐེ་ཝན་ནས་ཕེབས་པའི་རྙིང་འགྱུར་རྙིང་མའི་ཀཿཐོག་རིག་འཛིན་ཆེན་པོ་དང་བླ་མ་བཀྲ་ཤིས། འདི་གར་གཏན་བཞུགས་སྤྲུལ་སྐུ་ཡེ་ཤེས་དང་མཁན་པོ་བྱམས་པ། བླ་མ་མིག་དམར་བཅས་བླ་སྤྲུལ་མཁན་གྲྭ་དང་། ཆོས་ཚོགས་པ་ཁག་ཅིག་བཅས་ལྷན་འཛོམས་ཀྱིས་ཐོག་མར་རབ་གནས་ཀྱི་ཆོ་གའི་སྔོན་འགྲོར་གྱུར་པའི་ཕྱག་རྡོར་འབྱུང་པོ་འདུལ་བྱེད་ཀྱི་བདག་བསྐྱེད་ཆོ་གའི་རིམ་པ་ལེགས་པར་གསུངས་གྲུབ་རྗེས། བླ་གྲྭ་རྣམས་ཕྱི་རོལ་སིདྡྷིའི་དུང་འཁོར་ཡོད་སར་ཕེབས་ཏེ་རབ་གནས་དངོས་གཞི་རྒྱས་པར་གསུངས་ཤིང་། དེ་ཡང་ཐོག་མར་བགེགས་སྐྲད་དང་རྟེན་ལ་རབ་གནས་ཁྲུས་གསོལ། དུང་འཁོར་ལ་རྩ་གསུམ་ལྷ་ཡི་བྱིན་ཆེན་འབེབ་པ། དེ་ནས་མཇུག་ཆོག་གསུངས་པ་སོགས་སྦྱོར་དངོས་རྗེས་གསུམ་ཚང་མ་ལེགས་པར་གྲུབ་བོ།། སྤྲུལ་སྐུ་ཡེ་ཤེས་ཀྱིས་གནས་ཚུལ་སྤེལ།   

བདག་ཆེན་རིན་པོ་ཆེ་མཆོག་ལ་བརྟན་བཞུགས་ཀྱི་སྐུ་གསུང་ཐུགས་རྟེན་འདེགས་འབུལ་ཞུ་བཞིན་པ།   བདག་མོ་སྐུ་ཞབས་མཆོག་དང་རྗེ་བཙུན་མ་མ་ཀི་ལྷན་བཞུགས།     ཕུན་ཕོའི་གདུང་སྲས་རྣམ་པ་དང་རྗེ་བཙུན་མ་རྣམ་པ།   ཕུན་ཕོའི་རྗེ་བཙུན་མ་རྣམ་པ་དང་བདག་མོ་ལྷན་རྒྱས།   ཀཿཐོག་རིན་པོ་ཆེ་དང་སྤྲུལ་སྐུ་ཡེ་ཤེས། མཁན་པོ་བྱམས་པ། བླ་མ་བཀྲིས། བླ་མ་མིག་དམར། བླ་མ་བསྟན་འཛིན།   སྤྲུལ་སྐུ་ཡེ་ཤེས་ཀྱིས་ཕུན་ཚོགས་ལྔ་ལྡན་གྱི་བཤད་པ་འབུལ་བཞིན་པ།   མཁན་པོ་བྱམས་པ་བསྟན་འཕེལ་གྱིས་བརྟན་བཞུགས་ལྗགས་འདོན་གནང་བཞིན་པ།   ས་སྐྱ་དགོན་པའི་ཆོས་ཚོགས་པ་རྣམས།   ས་གནས་བོད་རིགས་ཚོགས་པའི་ཚོགས་མི་རྣམས། འདི་ཟླའི་ཚེས་བཅུ་དགུ་གཟའ་སྤེན་པའི་ཉིན་འདི་ག་བྱང་ཨ་རིའི་ས་སྐྱ་དགོན་བརྩེ་ཆེན་ཀུན་ཁྱབ་ཆོས་གླིང་དུ། ཕུན་ཕོའི་བདག་མོ་སྐུ་ཞབས་མཆོག་དང་མདོ་སྔགས་རིག་གནས་སོགས་ཀྱིས་བསྡུས་པའི་ཤེས་བྱ་ཀུན་ལ་མི་འཇིགས་པའི་མཁྱེན་རབ་མཆོག་ཏུ་མངའ་བ་ཀ་ཐོག་རིན་འཛིན་ཆེན་པོའི་སྐུ་ཕྲེང་དྲུག་པ་པདྨ་དབང་ཆེན་རིན་པོ་ཆེ་མཆོག མཁན་པོ་བྱམས་པ་བསྟན་འཕེལ་དང་སྐུ་ཚབ་བླ་མ་བཀྲ་ཤིས། ལྷ་བྲིས་བླ་མ་མིག་དམར་དང་མཆོད་དཔོན་གྲྭ་པ་བསྟན་འཛིན། གུས་པ་གདོལ་སྤྱོད་སྤྲུལ་གཟུགས་ཡེ་རྒྱམ་བཅས་ཀྱིས་མཁན་པོ་བྱམས་པ་ལགས་ཀྱིས་རྡོར་སློབ་གནང་སྟེ་འཕགས་མ་ཡིད་བཞིན་འཁོར་ལོའི་སྒོ་ནས་ཚེ་སྒྲུབ་ཟབ་མོ་བརྒྱུད་ལྡན་བླ་མ་དམ་པའི་ཕྱག་བཞེས་བཞིན་བསྒྲུབས་པ་དང་། ཚེས་ཉི་ཤུ་རེས་གཟའ་ཉི་མ་ཨ་རིའི་ཕ་ཡི་ཉིན་མོ་གཟའ་སྐར་མཆོག་ཏུ་དགེ་བའི་ཉིན་གྱི་ཞོགས་པར་སླར་ཡང་ཚེ་སྒྲུབ་ཟབ་མོ་ཚར་གཅིག་སྔོན་དུ་བཏང་སྟེ།  གངས་ལྗོངས་གྲུབ་པའི་འཁོར་སྒྱུར་དཔལ་ས་སྐྱའི་གོང་མ་བདག་ཆེན་འཇིགས་བྲལ་བདག་ཆེན་རིན་པོ་ཆེ་མཆོག་སྤོས་སྣ་དང་རྒྱ་གླིང་སོགས་མཆོད་པའི་ཡོ་བྱད་དུ་མས་མདུན་བདར་ཅིང་དཔལ་ས་སྐྱའི་གདུང་སྲས་རྣམ་པས་གཙོས་པའི་འདུས་པ་རྒྱ་མཚོས་གུས་བསུ་དང་བཅས་ལྷ་ཁང་མཐོང་གྲོལ་ཆེན་མོའི་སེང་ཁྲི་མཐོན་པོར་བཞུགས་སུ་གསོལ་རྗེས། བདག་མོ་སྐུ་ཞབས་དང་མཁན་པོ་བྱམས་པ་རྣམ་གཉིས་ཀྱིས་ཐུགས་འགན་བཞེས་ཏེ་སྔ་རྗེས་སུ་དཔལ་ས་སྐྱ་ཕུན་ཚོགས་ཕོ་བྲང་དང་ས་སྐྱ་དགོན་པ། ཀ་ཐོག་རིན་པོ་ཆེ་དང་བླ་མ་བཀྲ་ཤིས་ཀྱི་ཆོས་ཚོགས།  དགོན་པའི་ཆོས་ཚོགས་པ་ཁག ས་གནས་བོད་རིགས་སྤྱི་མཐུན་ཚོགས་པ་བཅས་ཀྱིས་མགོན་པོ་མཆོག་སྐུ་ཚེ་བསྐལ་བ་བརྒྱ་ཕྲག་ཏུ་བཞུགས་པའི་གསོལ་བ་འདེབས་རྟེན་དུ་དམིགས་པའི་མཎཌལ་སྐུ་གསུང་ཐུགས་ཡོན་ཏན་འཕྲིན་ལས་བཀྲ་ཤིས་རྟགས་བརྒྱད་བཀྲ་ཤིས་རྫས་བརྒྱད་སོགས་དངོས་བཤམས་ཡིད་སྤྲུལ་གྱི་མཆོད་པའི་དངོས་པོ་གཙང་ཞིང་ཡིད་དུ་འོང་བ་དུ་མས་མཆོད་སྤྲིན་ནམ་མཁའ་མཛོད་དུ་སྤྲོས་ཤིང་། གུས་རྨོངས་པས་འདོན་པའི་དབུ་སྐུལ་དང་འབྲེལ་ཕུན་སུམ་ཚོགས་པ་ལྔ་ལྡན་གྱི་བཤད་འབུལ། བདག་ཆེན་རིན་པོ་ཆེ་མཆོག་གིས་སྐུ་ཚེ་ཡུན་རིང་དུ་བཞུགས་པའི་ཞལ་བཞེས་ཟབ་མོ་གནང་བ་དང་འབྲེལ་བདག་མོ་སྐུ་ཞབས་ཀྱི་སྐུ་ཚེའི་ལོ་རྒྱུས་གུས་ཀྱིས་བྲིས་ཤིང་ཀ་ཐོག་རིག་འཛིན་སྒྲུབ་སྡེ་ནས་ཐེ་ཝན་དུ་པར་སྐྲུན་བྱས་པ་ཞལ་འབྱེད་གནང་བ་སོགས། མདོར་ན་མཛད་རིམ་མཐའ་དག་བཀྲ་ཤིས་པའི་དགེ་མཚན་དུ་མ་དང་བཅས་ལེགས་པར་གྲུབ་བོ།།

བདག་ཆེན་རིན་པོ་ཆེ་མཆོག་གིས་མེ་ནེ་སོ་ཀྲའི་བོད་རིགས་ཚོགས་ཁང་དུ་ཚེ་དབང་ཟབ་མོ་གནང་བཞིན་པ། འདི་ཟླའི་ཚེས་བཞི་ཉིན། དཔལ་ས་སྐྱ་གོང་མ་སྐྱབས་མགོན་འཇིགས་བྲལ་བདག་ཆེན་རིན་པོ་ཆེ་མཆོག་དང་བདག་མོ་སྐུ་ཞབས། མཁན་པོ་བྱམས་པ་དང་བླ་མ་མིག་དམར། གུས་སྤྲུལ་གཟུགས་ཡེ་ཤེས་བཅས་མེ་ནེ་སོ་ཀྲའི་ས་སྐྱའི་ཆོས་ཚོགས་བརྩེ་ཆེན་ཀུན་ཁྱབ་གླིང་གི་གདན་ཞུས་བཞིན་འདི་ག་སེ་ཨ་རོལ་ནས་ཕེབས་ཐོན་གྱིས་ཆུ་ཚོད་གཉིས་ལྷག་རིང་གནམ་གྲུར་ཞུགས་ཏེ་མེ་ནེ་སོ་ཀྲའི་གནམ་ཐང་དུ་ཕེབས་འབྱོར་སྐབས་ས་སྐྱའི་མཁན་པོ་སྐལ་རྒྱལ་དང་ས་གནས་ས་སྐྱའི་མི་མང་བཅས་ཀྱིས་རབ་དཀར་ལྷ་རེག་བཏེགས་ནས་ཕེབས་བསུ་གཟབ་རྒྱས་ཞུས་ཤིང་། གནམ་ཐང་ནས་བདག་ཆེན་རིན་པོ་ཆེ་སྟོན་འཁོར་སྐར་མ་བཞི་ལྡན་གྱི་མགྲོན་ཁང་ཞིག་ཏུ་གདན་འདྲེན་ཞུས་པ་དང་། ཚེས་ལྔའི་ཉིན་བདག་ཆེན་རིན་པོ་ཆེ་མཆོག་གིས་ས་གནས་བོད་རིགས་ཚོགས་ཁང་དུ་བོད་རིགས་བྱིས་པ་བརྒྱ་དང་བཞི་ཅུ་བརྒལ་བར་བླང་དོར་བཀའ་སློབ་དང་གང་བློ་མའི་ལྗགས་ལུང་། དེ་བཞིན་མཇལ་ཁ་བཅས་ཀྱི་བཀའ་དྲིན་བསྩལ། བྱིས་པ་ཚོའི་ངོས་ན ས་བོད་ཀྱི་རྒྱལ་གླུ་དང་ཚད་མེད་ཡོན་ཏན་སོགས་མཉམ་ལེན་གྱི་མཆོད་སྤྲིན་སྤྲོས། ཚེས་དྲུག་ཉིན་མི་མང་ལ་འཇམ་དབྱངས་དམར་སེར་གྱི་རྗེས་གནང་དང་། ཚེས་བདུན་ཉིན་ཚེ་རྟ་ཟུང་འབྲེལ་གྱི་རྗེས་གནང་བཀའ་དྲིན་བསྩལ། ཚེས་བརྒྱད་ཉིན་མི་མང་ལ་མཇལ་ཁ་ལྷོད་སྩལ་མཛད། ཚེས་དགུ་ཉིན་ཁམས་སྐྱེ་རྒུ་མདོའི་ས་ཡོམ་ཁྲོད་རྐྱེན་འདས་སུ་གྱུར་པ་དང་རྨས་སྐྱོན་ཤོར་བ། དེ་བཞིན་ནང་མི་སྤུན་མཆེད་འདས་གྲོངས་སུ་སོང་བ་སོགས་ཀྱི་ཆེད་དུ་དམིགས་པའི་བསྔོ་སྨོན་གསུང་ཕྱིར་ནང་ཆེན་ཉེར་ལྔའི་གདན་ཞུས་བཞིན་ཉིག་ཡོར་དུ་ཕེབས་ཐོན་གནང་ཞིང་། ཉིག་ཡོར་གནམ་ཐང་དུ་དཔལ་སྤྲུལ་རིན་པོ་ཆེ་སོགས་ཀྱིས་ཕེབས་བསུ་ཞུས། རྒྱ་གར་བའི་མགྲོན་ཁང་ཞིག་ཏུ་བཞུགས་ས་བཀོད་སྒྲིག་ཞུས་པ་བཞིན་དེ་གར་ལྷོད་བཞུགས་གནང་། ཚེས་བཅུ་ཉིན་མི་མང་ལ་མཇལ་ཁ་བཀའ་སློབ་བསྩལ་ཅིང་། ཚེས་ཉིན་བཅུ་གཅིག་ཉིན་ཨ་རིའི་ནང་ཆོས་མཁས་པ་ཆེན་པོ་རོ་སྦིར་ཐོར་མིན་གྱིས་གཙོ་སྐྱོངབྱེད་བཞིན་པའི་བོད་ཀྱི་ཁང་པ་རུ་མཁན་པོ་པད་མ་ལགས་ཀྱི་ཆོས་ཚོགས་པ་དང་བོད་རིགས་འདུས་པ་ཁག་ཅིག་གི་ངོར་སྤྱན་རས་གཟིགས་ཀྱི་རྗེས་གནང་བསྩལ། ཚེས་ཉིན་བཅུ་གཉིས་ཉིན་ཀུན་རིག་རྣམ་པར་སྣང་མཛད་ཀྱི་ཆོ་གའི་སྒོ་ནས་གཤིན་པོ་རྣམས་ཀྱི་མིང་བྱང་སྲེག་ཆོག་གནང་། ཚེས་བཅུ་གསུམ་ཉིན་མི་མང་ཆིག་སྟོང་བརྒལ་བར་དཔལ་རྡོ་རྗེ་ཕུར་པའི་གཏོར་དབང་བཀའ་དྲིན་བསྩལ། བཀའ་དབང་གི་མཇུག་ཏུ་བོད་ཀྱི་ཆོས་དང་རིག་གཞུང་འཛིན་སྐྱོང་སྤེལ་གསུམ་ལས་བརྩམས་པའི་བཀའ་སློབ་དང་། བདག་མོ་སྐུ་ཞབས་མཆོག་ནས་ཀྱང་དེ་འབྲེལ་བཀའ་སློབ་བོད་དབྱིན་གཉིས་ཀའི་སྒོ་ནས་བསྩལ། འདི་སྐབས་སྔ་དགོང་གཉིས་ཀར་མི་མང་བརྒྱ་ཕྲག་མང་པོར་མཇལ་ཁ་དང་གསུང་བརྟག་བསྩལ། ཚེས་བཅུ་བཞི་ཉིན་ཧྥུ་ལ་ཞིན་ས་གནས་སུ་ཡོད་པའི་ཀརྨ་བཀའ་བརྒྱུད་པའི་བླ་མ་ཚེ་དབང་གི་ཆོས་ཚོགས་གསར་པར་ཕེབས་ཏེ་རབ་གནས་བྱིན་འབེབ་དང་ནང་ཆོས་ངོ་སྤྲོད་མདོར་བསྡུས་བསྩལ།   ཚེས་བཅོ་ལྔའི་ཞོགས་པར་མན་ཧ་ཀྲན་ཁེ་སྦོ་ཞེས་པའི་བརྙན་འཕྲིན་ལས་རིམ་གྱིས་ནང་ཆོས་དང་ས་ཡོམ་གྱི་གོད་ཆག་སོགས་དང་འབྲེལ་བའི་བཀའ་འདྲི་ཞུས་པར་བཀའ་ལན་གནད་དུ་ཁེལ་བ་བསྩལ་ཅིང་། དགོང་དྲོའི་ཆུ་ཚོད་བརྒྱད་པར་ཉིག་ཡོར་ནས་ས་ཨ་རོལ་དུ་ཆིབ་སྒྱུར་བསྐྱངས་པ་བཅས་ཐེངས་འདིའི་མཛད་རིམ་མདོར་གསལ་འདི་ཙམ་ལགས། སྤྲུལ་སྐུ་ཡེ་ཤེས་ཀྱིས་བྲིས།   མེ་ནེ་སོ་ཀྲའི་ས་སྐྱའི་བླ་མ་སྐལ་རྒྱལ་གྱི་ཆོས་ཚོགས་སུ་ས་སྐྱའི་མི་མང་དང་ལྷན་བཞུགས།   ཉིག་ཡོར་དུ་མི་མང་ལ་ཕུར་པའི་བཀའ་དབང་་གསུང་བཞིན་པ།   ཕུར་པའི་བཀའ་དབང་ཞུ་བཞིན་པའི་ཉིག་ཡོར་བོད་རིགས་མི་མང་།  

 

  དེ་རིང་ཁམས་སྐྱེ་རྒུ་མདོར་ས་ཡོམ་གྱི་གོད་ཆག་ཡ་ང་བ་ཞིག་བྱུང་སྟེ་མི་མང་པོ་རྐྱེན་འདས་དང་རྨས་སྐྱོན། དེ་བཞིན་དགོན་པའི་གཙུག་ལག་ཁང་དང་གྲྭ་ཤག་སོགས་སྡོད་ཁང་མང་པོ་ཞིག་རྩ་བརླག་ཏུ་གྱུར་པའི་གནས་ཚུལ་ཐོས་པས་སེམས་ཁྲལ་ཆེན་པོ་བྱུང་ཞིང་། ངོས་ཀྱིས་བསླུ་མེད་དཀོན་མཆོག་གསུམ་ལ་ཚེ་འདས་རྣམས་ཀྱིས་བདེ་འགྲོའི་རྟེན་བཟང་འཐོབ་པ་དང་། རྨས་སྐྱོན་ཕོག་པ་རྣམས་མགྱོགས་མྱུར་དྲགས་སྐྱེད་ཡོང་བ། དེ་བཞིན་ཤུལ་ལུས་ནང་མི་རྣམས་ཀྱིས་གཙོས་པའི་འགྲོ་བ་རྣམས་སྡུག་བསྔལ་ལས་གྲོལ་བའི་གསོལ་བ་བཏབ་དང་འདེབས་བཞིན་ཡོད་པ་དང་།      འདི་གའི་ས་སྐྱ་དགོན་པའི་ཆོས་ཚོགས་པ་རྣམས་དང་ས་གནས་བོད་རིགས་རྣམས་མཉམ་འཛོམས་ཀྱིས་གངས་ལྗོངས་ལྷ་སྐལ་འཕགས་མཆོག་སྤྱན་རས་གཟིགས་ཀྱི་སྒོམ་བཟླས་དང་འབྲེལ་བའི་མ་ཎི་དང་སྨན་བླའི་མཚན་སྔགས། དེ་བཞིན་འཕགས་པ་བཟང་པོ་སྤྱོད་པ་སྨོན་ལམ་གྱི་རྒྱལ་པོ་བཅས་གང་མང་གསོག་སྒྲུབ་བྱས་དང་བྱེད་བཞིན་ཡོད་པ་ཐུགས་འཇག་འཚལ།།                                            ཕུན་ཕོའི་འཇིགས་བྲལ་བདག་ཆེན་གྱིས།                                                              སྤྱི་ཟླ་བཞི་པའི་ཚེས་བཅུ་བཞིའི་ཉིན།